विकारादेशोपदेशात् संशयः ।
प्रकृतिविवृद्धौ विकारविवृद्धेः ।
न्यूनसमाधिकोपलब्धेर्विकाराणामहेतुः ।
द्विविधस्यापि हेतोरभावादसाधनं दृष्टान्तः ।
न; अतुल्यप्रकृतीनां विकारविकल्पात् ।
द्रव्यविकारवैषम्यवद्वर्णविकारविकल्पः ।
न; विकारधर्मानुपपत्तेः ।
विकारप्राप्तानामपुनरापत्तेः ।
सुवर्णादीनां पुनरापत्तेरहेतुः ।
न; तद्विकाराणां सुवर्णभावाव्यतिरेकात् ।
नित्यत्वेऽविकारादनित्यत्वे चानवस्थानात् ।
नित्यानामतीन्द्रियत्वात् तद्धर्मविकल्पाच्च वर्णविकाराणामप्रतिषेधः ।
अनवस्थायित्वे च वर्णोपलब्धिवत्तद्विकारोपपत्तिः ।
विकारधर्मित्वे नित्यत्वाभावात् कालान्तरे विकारोपपत्तेश्चाप्रतिषेधः ।
प्रकृत्यनियमाद् ।
अनियमे नियमान्नानियमः ।
नियमानियमविरोधादनियमे नियमाच्चाप्रतिषेधः ।
गुणान्तरापत्त्युपमर्दह्रासवृद्धिलेशश्लेषेभ्यस्तु विकारोपपत्तेर्वर्णविकारः ।