आदिमत्त्वादैन्द्रियकत्वात् कृतकवदुपचाराच्च ।
न; घटाभावसामान्यनित्यत्वात् नित्येष्वप्यनित्यवदुपचाराच्च ।
तत्त्वभाक्तयोर्नानात्वविभागादव्यभिचारः ।
सन्तानानुमानविशेषणात् ।
कारणद्रव्यस्य प्रदेशशब्देनाभिधानात् ।
प्रागुच्चारणादनुपलब्धेरावरणाद्यनुपलब्धेश्च ।
तदनुपलब्धेरनुपलम्भादावरणोपत्तिः ।
अनुपलम्भादप्यनुपलब्धिसद्भाववन्नावरणानुपपत्तिरनुपलम्भात् ।
अनुपलम्भात्मकत्वादनुलब्धेरहेतुः ।
अस्पर्शत्वात् ।
न, कर्मानित्यत्वात् ।
न, अणुनित्यत्वात् ।
सम्प्रदानात् ।
तदन्तरालानुपलब्धेरहेतुः ।
अध्यापनादप्रतिषेधः ।
उभयोः पक्षयोरन्यतरस्याध्यापनादप्रतिषेधः ।
अभ्यासात् ।
नान्यत्वेऽप्यभ्यासस्योपचारात् ।
अन्यदन्यस्मादनन्यत्वादनन्यदित्यन्यताऽभावः ।
तदभावे नास्त्यनन्यता, तयोरितरेतरापेक्षसिद्धेः ।
विनाशकारणानुपलब्धेः ।
अश्रवणकारणानुपलब्धेः सततश्रवणप्रसङ्गः ।
उपलभ्यमाने चानुपलब्धेरसत्त्वादनपदेशः ।
पाणिनिमित्तप्रश्लेषाच्छब्दाभावे नानुपलब्धिः ।
विनाशकारणानुपलब्धेश्चावस्थाने तन्नित्यत्वप्रसङ्गः ।
अस्पर्शत्वादप्रतिषेधः ।
विभक्त्यन्तरोपपत्तेश्च समासे ।